Almennir viðskipta-, sölu- og afhendingarskilmálar Björgun-Sement

1. FORSENDUR SKILMÁLA

1.1 Björgun-Sement er söluaðili og framleiðandi steinefna fyrir mannvirkjagerð ásamt því að sinna hafnar- og dýpkunarþjónustu fyrir stofnanir og fyrirtæki ásamt því að flytja inn og selja sement.

Sement er selt til:
1: Fyrirtækja sem nota meira en 500 tonn á ári, og sem reka steypuframleiðslustöðvar („fagaðilar“).
2. Sementseljenda sem ekki standa sjálfir að steypuframleiðslu.
3. Verktaka vegna mannvirkjagerðar.
4. Til einkaaðila í heilum brettum (960 kg) eða stórsekkjum Saman er vísað til þeirra sem „viðskiptavina“

1.2 Ef ekki er sérstaklega um annað samið þá gilda þessir skilmálar við reglulega endurtekin kaup, stök viðskipti, tilboðsgerð í stór verkefni sem og aðra þjónustu Björgun-Sement.

2. TILBOÐ | SAMNINGAR | VERÐ

2.1. Viðskiptavinir og fagaðilar sem hafa samninga um föst viðskipti, hafa gert samkomulag um afhendingu sem gildir um regluleg endurtekin viðskipti. Í slíkum viðskiptum fer verð, greiðsluskilmálar, afhendingarstaður og gæðakröfur eftir þeim samningum. Um önnur viðskipti sem og tilvik þar sem þeim samningum sleppir, fer eftir skilmálum þessum.
2.2. Verðtilboð sem byggja á sölu- og afhendingarskilmálum þessum gilda í einn mánuð, sé ekki um annað samið. Björgun-Sement er verulega háð hráefniskostnaði við verðlagningu sína á sementi. Verði félagið fyrir verulegum hækkunum (yfir 10%) frá birgjum fyrir afhendingu varanna en eftir að pöntun er gerð eða verðtilboð sett fram, skal fyrirtækinu heimilt að hækka áður uppgefin verð því til samræmis. Þá er Björgun-Sement ekki bundin við verðtilboð ef aðrar verulegar breytingar verða á þeim forsendum sem því lágu til grundvallar.
2.3. Afhendingardagur skal teljast gjalddagi nema samið sé um annað. Berist greiðslur ekki á gjalddaga við afhendingu vara, eða innan greiðslufrests sé hann umsaminn, reiknast dráttarvextir skv. 1. mgr. 6. gr. laga nr. 38/2001, auk innheimtukostnaðar. Björgun-Sement á jafnframt rétt á því að hafna frekari afhendingum til viðskiptavinar, óháð því hvort þær tengist sama verkefni eða öðrum.
2.4. Viðskiptavini ber að staðgreiða öll viðskipti nema skriflegt samkomulag liggi fyrir um annað. Viðskiptavinur hefur ekki skuldajafnaðarrétt.
2.5. Steinefni og sement eru seld í lausu frá starfsstöðvum Björgun-Sement. Semja má um flutning frá birgðastöð sements til viðskiptavinar samanber verðlista um flutningskostnað sem uppfærður er mánaðarlega. Björgun-Sement sér ekki um flutning á pökkuðu sementi.
2.6. Eigin innkaupaskilmálar, almennir skilmálar eða önnur skilyrði viðskiptavinar gilda ekki um viðskiptin hvort sem Björgun-Sement telst meðvituð um þá eða ekki.
2.7 Allt sement sem afhent er reiknast á verði afhendingardags, sé ekki um annað samið.

3. EIGINLEIKAR FRAMLEIÐSLU

3.1. Steinefni og sement eru afhent í samræmi við tæknilýsingar sem samþykktar hafa verið við pöntun og skv. gildandi lögum, fyrirmælum og sérstökum staðalákvæðum.
3.2. Steinefnin koma úr námum í sjó og á landi og eru ýmist hörpuð eða brotin í stærðarflokka fyrir viðkomandi vörutegundir. Steinefni frá Björgun-Sement uppfylla skilyrði um endursölu á steinefnum skv.kröfum Evrópusambandsins. Að auki eru margar vörutegundir sem hafa hlotið CE vottun og EPD vottun (sjá nánar á vefsíðu fyrirtækisins).
3.3. Eiginleikar steinefna eru gefnir upp í tækniblöðum á vefsíðu fyrirtækisins.
3.4. Kvartanir er varða ófullnægjandi gæði þarf að rökstyðja með prufutöku og setja fram skriflega án órökstuddrar tafar eftir að kvörtunarefnið kom í ljós eða hefði átt að koma í ljós. Viðskiptavinur ber sönnunarbyrði fyrir því að gæðakröfum hafi verið fylgt eftir móttöku vörunnar og áskilur Björgun-Sement sér rétt til þess að hafna fram kominni kröfu ef ekki er unnt að sýna fram á það á fullnægjandi hátt.
3.5. Komi í ljós að gæði vörunnar eru ófullnægjandi skal Björgun-Sement leita sanngjarnra leiða til þess að afhenda ógallaða vöru. Ný afhending getur hins vegar ráðist af birgðastöðu hvers tíma. Um afhendingu fer eftir skilmálum þessum sé ekki um annað samið. Geti Björgun-Sement ekki afhent vöruna eða sambærilega vöru innan hæfilegs frests getur viðskiptavinur fengið endurgreiðslu.
3.6 Sement sem framleitt er í verksmiðjum Heidelberg Materials Sement Norge í Kjøpsvik og Brevik, er eingöngu afhent með þeim eiginleikum sem gefnir eru upp í gæðaupplýsingum og vörulýsingablöðum Heidelberg Materials Sement Norge.
3.7 Gæðaupplýsingar og vörulýsingablöð sements má finna á vefsíðu Heidelberg Materials Sement Norgeundir „kundesenter“ og fást einnig send ef óskað er. Finna má ofangreindar upplýsingar á íslensku á vefsíðu Björgun-Sement.
3.8 Gæðaupplýsingar Heidelberg Materials Sement Norge innihalda niðurstöður úr innra gæðaeftirliti á vörunni og sérstaklega er getið um frávik frá viðmiðunargildum.

4. AÐGENGI

4.1. Björgun-Sement hefur skýrt markmið um að eiga alltaf nægilegt magn steinefna og sements á lager fyrir viðskiptavini sína. Engin trygging er þó fyrir því að svo sé og getur Björgun-Sement enga ábyrgð borið ef félagið á ekki nægjanlegar birgðir til að uppfylla þarfir viðskiptavinarins.
4.2. Það er skilyrði að viðskiptavinur upplýsi Björgun-Sement um áætlað reglulega keypt magn og geti þess sérstaklega ef stórinnkaup eru fyrirséð og þá með að minnsta kosti 60 daga fyrirvara.
4.3. Björgun-Sement kemur á verklagsreglu gagnvart hverjum viðskiptavin varðandi pantanir og afhendingu á sementi og upplýsir viðskiptavininn um verklagið.

5. VERÐ, GREIÐSLUKJÖR, INNHEIMTA O.FL.

5.1. Allt verð sem Björgun-Sement gefur upp er grunnverð nema annað sé tekið fram. Verð er ýmist gefið skv. gjaldskrá á vefsíðu fyrirtækisins eða skv. tilboði. Virðisaukaskattur er innifalinn í uppgefnu verði nema annað sé sérstaklega tekið fram.
5.2. Staðgreiða skal allar vörur nema annað sé um samið, sbr. grein 6 í skilmálum þessum.
5.3. Hafi félagið samþykkt staðgreiðsluafslátt eða magnafslátt skal fjárhæð afsláttar dragast frá grunnverði. Afslættir eru ekki gefnir af tilboðsverði.
5.4. Félagið áskilur sér rétt til að breyta gjaldskrá hvenær sem er og tekur ný gjaldskrá gildi við birtingu á vefsíðu.
5.5. Í tengslum við reikningsviðskipti skal reikningur greiddur í síðasta lagi á eindaga, þ.e. 15. dag næsta mánaðar eftir úttektarmánuð. Reikningar eru gefnir út með rafrænum hætti og sendir viðskiptavin eftir vöruúttekt daglega
5.6. Hafi viðskiptavinur athugasemd við útgefinn reikning ber honum að gera athugasemd við hann fyrir eindaga, en annars telst hann samþykktur.
5.7. Sé reikningur ekki greiddur í síðasta lagi á eindaga reiknast dráttarvextir skv. 1. mgr. 6. gr. laga nr. 38/2001 af útistandandi heildarskuld viðskiptavinar við félagið frá fyrsta degi næsta mánaðar á eftir úttektarmánuð. Kostnaður við send innheimtubréf og innheimtuviðvörun skal greiðast af viðskiptavini og áskilur félagið sér allan rétt til að senda áfallna viðskiptskuld í innheimtu í samræmi við gildandi innheimtulög.
5.8. Hafi félagið samþykkt sérstök afsláttarkjör er félaginu heimilt að segja slíkum kjörum upp án fyrirvara eða sérstakrar tilkynningar án þess að litið sé á það sem uppsögn viðskipta. Í tilviki greiðsludráttar áskilur félagið sér jafnframt rétt til að fella niður án fyrirvara alla afslætti sem kunna að hafa verið gefnir af vöruúttektum skv. úttektarnótum og/eða reikningum, þar með talda afslætti sem veittir eru í sérstökum tilboðum og/eða samningum við viðskiptavin.

6. REIKNINGSVIÐSKIPTI, ÚTTEKTARHEIMILDIR OG ÚTTEKTARAÐILAR

6.1. Reikningsviðskipti eru háð samþykki Eignarhaldsfélagsins Hornsteins (móðurfélag Björgun-Sement) og er forsenda slíkra viðskipta sú að viðunandi tryggingar séu til staðar fyrir reikningsúttektum og að viðskiptavinur sé ekki skráður á vanskilaskrá Creditinfo. Hvað telst viðunandi trygging er undir félaginu komið hverju sinni.
6.2. Sé viðskiptavinur lögaðili setur félagið það sem skilyrði fyrir reikningsviðskiptunum að þau séu tryggð með ábyrgð ábyrgðarmanns sem er þinglýstur eigandi fasteignar og ekki skráður á vanskilaskrá Creditinfo. Þá getur félagið krafist bankaábyrgða, veðtrygginga eða annarra trygginga.
6.3. Viðskiptareikningar Björgun-Sement eru mánaðarreikningar. Úttektartímabil er hver almanaksmánuður og er gjalddagi viðskiptareiknings fyrsta dag næsta mánaðar á eftir úttektartímabili.
6.4. Við upphaf samþykktra reikningsviðskipta tekur félagið ákvörðun um úttektarheimildir viðskiptavinar. Úttektarheimildir eru ákvarðaðar á grundvelli mats félagsins á þeim tryggingum, sem viðskiptavinur leggur fram við upphaf viðskiptanna. Félagið áskilur sér rétt til að endurskoða það mat án sérstakrar tilkynningar eða viðvörunar. Úttektarheimildir kunna því að breytast án þess að það sé tilkynnt sérstaklega.
6.5. Viðskiptavinur skal tilkynna félaginu um þá einstaklinga (úttektaraðila) sem heimild hafa til að taka út í reikning hans og/eða óska eftir lykilorði eða leyninúmeri sem nota má til úttekta. Sé slíkt ekki gert eru allar úttektir í viðskiptareikning hjá félaginu á ábyrgð viðskiptavinar. Starfsfólk félagsins getur óskað eftir því að úttektaraðilar sýni skilríki til að sanna á sér deili við hverja úttekt.
6.6. Viðskiptavini ber að tilkynna félaginu með sannanlegum hætti ef úttektaraðili hefur ekki lengur heimild til úttekta fyrir hans hönd. Úttektaraðili telst því hafa heimild til að taka út í reikning fyrir hönd viðskiptavinar uns breytingar þar á hafa verið tilkynntar félaginu.

7. AFHENDING OG MÓTTAKA VÖRU

7.1. Steinefnin eru afhent á athafnasvæði Björgun-Sement
7.2. Viðskiptavinur eða flutningsaðili á hans vegum skal fylgja öryggisreglum Björgun-Sement og vera í öryggis- og sýnileikafatnaði við starf sitt. Viðkomandi þarf að fylgja öllum þeim reglum sem viðhafðar eru á athafnasvæði Björgun-Sement.
7.3. Viðskiptavinur ber áhættu af vörunni frá afhendingu til flutningsaðila á hans vegum. Ef varan skemmist eða rýrnar eftir afhendingu til flutningsaðila vegna ástæðna sem Björgun-Sement ber ekki ábyrgð á, skal slíkri kröfu beint til flutningsaðila. Í slíkum tilfellum mun Björgun-Sement þó leita sanngjarnra leiða til að afhenda viðskiptavini nýja vöru.
7.4. Viðskiptavinur ber ábyrgð á öllum skemmdum sem hann eða aðilar á hans vegum kunna að valda á athafnasvæði Björgun-Sement, þ.m.t. skaðabótaábyrgð. Þá geta skemmdir eða brot gegn öryggisreglum leitt til þess að viðskiptavini eða aðilum á hans vegum verði meinaður aðgangur að athafnasvæðinu.
7.5. Viðskiptavinur er skuldbundinn til að taka á móti vöruafhendingu á umsömdum tíma og móttökustað.
7.6 Viðskiptavinur verður að gera Sementsverksmiðjunni strax viðvart ef hann getur ekki tekið á móti umsömdu magni.
7.7 Viðskiptavinur ber ábyrgð á aukakostnaði sem hlýst af því að hann getur ekki tekið við vöruafhendingu sem samið var um, til dæmis ef biðtími verður fyrir flutningsaðilann.

8. SEINKUN

8.1. Björgun-Sement ber ekki ábyrgð á seinkunum vegna afhendingar á vörum sem verða vegna tafa sem fyrirtækið getur ekki haft stjórn á og getur ekki með sanngirni talist ábyrgt fyrir eða átt möguleika á að forðast eða komast hjá afleiðingum af. Kringumstæður, sem ekki teljast á valdi Björgun-Sement að hafa stjórn á, eru þ.m.t. en takmarkast ekki við náttúruhamfarir, faraldur eða heimsfaraldur, stríð, uppreisnir, elda, þjófnað, skemmdarverk, vinnudeilur og verkföll innanlands eða erlendis, umferðarteppur, eldsneytis- eða annar efnisskortur, þ.m.t. birgðaskortur, ásamt öllu því sem flokkast undir „force majeure“. Í slíkum tilvikum getur afhending dregist um þann tíma sem hindranir standa yfir.
8.2. Björgun-Sement mun tilkynna kaupendum sínum um seinkanir án tafar.
8.3. Ef um er að ræða verulega seinkun sem Björgun-Sement á að hafa stjórn á, á viðskiptavinurinn rétt á bótum fyrir beint tap sitt vegna seinkunarinnar. Í slíkum tilfellum þarf að tilkynna Björgun-Sement þegar í stað um bótakröfu og verður slík krafa skráð um leið. Bótaábyrgð Björgun-Sement takmarkast við fjárhæð sem nemur þeim hluta afhendingarinnar sem seinkun varð á.
8.4. Ef ekki hefur verið um annað samið verður viðskiptavinur að sætta sig við frávik varðandi afhendingu sem nemur allt að sólarhring á lausu sementi af umsaminni tegund. Sé um lengra frávik að ræða takmarkast ábyrgð Björgun-Sement við að greiða skráðan kostnað vegna annarra dreifingarúrræða sem Björgun-Sement hefur samþykkt áður á sementi á umsömdu verði ef viðskiptavinur getur ekki notað aðra sementstegund.
8.5. Ef um langvarandi afhendingarörðugleika er að ræða eða seinkanir sem rekja má til grófrar vanrækslu af hálfu Björgun-Sement, þá takmarkast ábyrgð hennar við reikningsupphæð á afhendingunni sem seinkun sem varð á. Björgun-Sement ber ekki ábyrgð á rekstrartapi, tekjutapi, dagsektum eða öðru óbeinu tapi nema í það megi rekja til stórkostlegs gáleysis Björgun-Sement.
8.6. Ef seinkanir verða skuldbindur viðskiptavinurinn sig til þess að hefja þegar aðgerðir sem miða að því draga úr kostnaði vegna seinkunarinnar. Verði það ekki gert skal sú fjárhæð sem hefði leitt af takmörkun koma til frádráttar tjóninu.
8.7. Kvartanir vegna seinkunar á afhendingu skulu afhentar skriflega án tafar, eigi síðar en innan sólarhrings frá áætluðum afhendingardegi.
8.8. Séu markaðsaðstæður þannig að óvenju mikið hafi verið tekið úr sílóunum skoðast tímabundin stopp á afhendingu ekki sem seinkun.

9. MÓTTÖKUEFTIRLIT

9.1. Steinefnategund og sementstegund er skráð á fylgiseðilinn. Viðskiptavinur skal kanna að afhent steinefna- eða sementstegund sé sú sama og pöntuð var.
9.2. Ef ósamræmi er milli pöntunar og afhentrar vöru skal steinefnunum skilað þegar í stað og ný afhending afgreidd svo fljótt sem auðið er eftir að Björgun-Sement hefur móttekið kvörtunina.
9.3. Kvörtunum þarf að koma á framfæri strax og viðskiptavinur verður var við eða hefði mátt vita um kvörtunarefnið og í síðasta lagi innan þriggja daga. Allar kvartanir þarf að leggja fram skriflega. Kvartanir má senda á netfangið postur@bjorgunsement.is
9.4. Ef gallinn er þess eðlis að viðskiptavinur mátti hafa vitað um hann fyrir afhendingu er ábyrgð Björgun-Sement takmörkuð við nýja afgreiðslu.

10. ÁBYRGÐ

10.1. Björgun-Sement ber enga ábyrgð á hvers kyns óbeinu tjóni, s.s. rekstrartapi, tekjutapi, dagsektum eða öðru innra tapi, nema það megi rekja til stórkostlegs gáleysis Björgun-Sement.
10.2. Viðskiptavinur skuldbindur sig til að halda Björgun-Sement skaðlausri af hvers konar tjóni sem Björgun-Sement verður fyrir vegna athafna eða athafnaleysis viðskiptavinar, í samræmi við almennar skaðabótareglur.
10.3. Ef mistök verða við afhendingu takmarkast ábyrgð Björgun-Sement við kr. 2.000.000, -tværmilljónir króna, samanlagt, vegna tjóni á eigum viðskiptavinar, framleiðsluvörum, lausafjármunum, eða hvers konar annars tjóns viðskiptavinar.
10.4. Heidelberg Materials Sement Norge stendur fyrir stöðugri þróun á framleiðsluvörum sínum. Björgun-Sement setur fyrirvara um að breytingar kunna að verða á framleiðsluvörum með að minnsta kosti tveggja mánaða fyrirvara.

11. FORCE MAJEURE - ÓVIÐRÁÐANLEG ATVIK

11.1. Komi upp óviðráðanleg atvik („force majeure“), er hvorum samningsaðila heimilað að fresta skyldum sínum samkvæmt skilmálum þessum meðan það ástand varir. Með force majeure atvikum er almennt átt við aðstæður sem hvorugur aðila gat séð fyrir og hafa bein áhrif á efndir. Að öðru leyti fer um þetta efni eftir almennum reglum kröfuréttar um efndir loforða og samninga. Samningsaðili sem vill bera fyrir sig slík atvik skal tilkynna gagnaðila þar um, með sannanlegum hætti og ef gagnaðili krefst þess, að leggja fram nauðsynleg gögn um tilvist, efni og tímalengd slíkra aðstæðna. Nú varir óviðráðanlegt atvik svo lengi að forsendur bresta fyrir viðskiptunum og er þá hvorum aðila um sig heimilt að ganga frá þeim.

12. UPPSÖGN

12.1. Sé ekki kveðið á um uppsagnarfrest í samningi félagsins við viðskiptavin eða sérskilmálum skal uppsagnarfrestur vera þrír mánuðir og skal uppsögn taka gildi um mánaðarmót.
12.2. Félagið getur hvenær sem er, fyrirvara- og bótalaust, sagt upp samningi við viðskiptavin vegna brots hans á samningsskyldum nema annað leiði ótvírætt af skilmálum þessum, sérskilmálum, samningum eða lögum. Eigi félagið viðskipti við viðskiptavin á grundvelli fleiri samninga en eins leiða brot hans á einum samningi til þess að félagið getur sagt upp öllum samningum sínum við viðkomandi viðskiptavin.

13. SKILMÁLAR

13.1. Björgun-Sement hefur rétt til að breyta skilmálunum og taka uppfærðir skilmálar gildi við birtingu gjaldskrár á vefsíðunni bjorgunsement.is. Sé um breytingar að ræða sem hafa áhrif á skyldur viðskiptavina skulu breytingarnar taka gildi 30 dögum eftir að tilkynning er send viðskiptavin um breytingar.

14. LÖG OG LÖGSAGA

14.1. Um skilmála þessa og viðskipti Björgun-Sement og viðskiptavinar gilda íslensk lög.
14.2. Úrlausn ágreiningsmála vegna skilmála þessara og viðskipti Björgun-Sement og viðskiptavinar sem ekki tekst að leysa í sátt skal heyra undir Héraðsdóm Reykjavíkur.